Stafell Sbâr Sain: Klust

Pleser yw cyhoeddi bod Recordiau Sain a gwefan gerddoriaeth Klust yn partneru i ryddhau albwm aml-gyfrannog arbennig - allan ar feinyl 12” fis Tachwedd 2024.

Fel rhan o brosiect cydweithredol newydd a lansiwyd gan Sain, mae’r albwm deg trac wedi ei guradu gan Klust a bydd yn cael ei ryddhau ar Recordiau Sain. Y cyntaf mewn cyfres o recordiau, mae’r casgliad cyntaf hwn yn cynnwys gweithiau gwreiddiol gan rai o artistiaid mwyaf cyffrous Cymru ar hyn o bryd gan gynnwys Talulah, WRKHOUSE, Malan, Siula a Sywel Nyw a bydd yn cael ei ryddhau fel rhan o becyn ecsgliwsif gyda’r rhifyn diweddaraf o gylchgrawn Klust. Recordiwyd y traciau yn Stiwdio 1 yn Sain, Llandwrog, dros gyfnod o chwe mis, gyda’r cyfarwyddwr ffilm, Aled Victor, yn creu cyfres o fideos tu ôl i’r llen i gyd-fynd â phob un o’r pum sesiwn byw.

Wedi’i lansio yn 2022, mae Klust yn llwyfan aml-gyfrwng i ddathlu, cefnogi a hyrwyddo cerddoriaeth newydd o Gymru, ac addas, felly, yw cael Klust i ddewis y traciau ar gyfer ‘Stafell Sbâr’ cyntaf Sain. Eglura sylfaenydd y wefan, Owain Williams: “Mae’n gasgliad cynhwysfawr, a dwyieithog, o draciau newydd sbon a fersiynau gwahanol o ganeuon sydd wedi eu rhyddhau eisoes ac mae’n tynnu sylw at rai o artistiaid mwyaf blaenllaw Cymru heddiw. Bydd yr albwm yn cael ei ryddhau law yn llaw â thrydydd cylchgrawn Klust - rhifyn 60 tudalen arbennig gyda chyfraniadau gan ugain awdur newydd o Gymru.”

Y cyntaf mewn cyfres o brosiectau cyd-weithio cyffrous gan Sain, bydd ‘Stafell Sbâr’ yn cael ei lansio yng Caffi Maes B yn yr Eisteddfod Genedlaethol, nos Wener 9fed o Awst, gyda’r artistiaid a’r cynhyrchwyr Sywel Nyw, Talulah, Alaw a Don Leisure yn troelli’r traciau rhwng 19:00-22:00. Wedi’i wasgu ar 200 copi arbennig yn defnyddio deunyddiau ecogyfeillgar, bydd y feinyl yn cael ei ryddhau fis Tachwedd ac ar gael yn ddigidol yn y flwyddyn newydd drwy Recordiau Sain. Dyluniwyd yr albwm, a’r cylchgrawn, gan y dylunydd graffeg annibynnol, Elis Povey.

Traciau:

1. Ffafriaeth (Talulah)
2. Out of the Blue (WRKHOUSE)
3. Fallen Angel (Siula)
4. Harbwr Aberteifi (Sywel Nyw)     
5. Lonely (Malan)  
6. Byth yn Blino (Talulah)  
7. Take (WRKHOUSE)
8. Ofni (Cotton Wolf re-work) (Siula)
9. Diwrnod Arall (Sywel Nyw)     
10. Dau Funud (Malan)