Gad Mi Ddod Mewn

Mae Gad Mi Ddod Mewn', yn ffrwyth llafur blwyddyn gron, ac aelodau Ciwb, sef Elis Derby, Gethin Griffiths, Marged Gwenllian a Carwyn Williams, wedi cydweithio eto gyda nifer o gantorion amlwg y sîn gerddoriaeth yng Nghymru i greu cyfyrs newydd sbon o ganeuon o archif label Sain. Rhyddhawyd albym cyntaf y band, 'Wyt Ti'n Meddwl Bod o Wedi Darfod?', yn 2021 gyda chyfraniadau gan nifer o artistiaid amlwg fel Mared Williams, Rhys Gwynfor, Alys Williams, Osian Huw Williams, Iwan Fôn, Heledd Watkins, Joseff Owen, Lily Beau a Dafydd Owain. Mae'r albym newydd yn cynnwys rhestr arall o enwau cyffrous, sef Ifan Davies, Buddug, Magi, Ifan Pritchard, Hollie Singer, Lisa Jên, Griff Lynch ac artistiaid y ddwy sengl, Elidyr Glyn ac Eban Elwy.

Gyda fersiynau newydd o ganeuon artistiaid fel Sidan, Steve Eaves, Y Cyrff, Llwybr Cyhoeddus, Mojo, Trwynau Coch, Angylion Stanli, Heather Jones ac Edward H, mae'n gymysgfa o gerddoriaeth bop, roc meddal, a seicadelia, ac yn fwy eang o ran arddulliau cerddorol na'r albym cyntaf, a phob cyfyr yn cael triniaeth unigryw gan amlygu elfennau gwreiddiol y caneuon ond gyda talp enfawr o wreiddioldeb cerddorol Ciwb.

Bydd lansiad swyddogol yr albym yn Neuadd y Farchnad, Caernarfon, ar Orffennaf 12fed, fel rhan o Gŵyl Arall, lle bydd Ciwb yn gwneud perfformiad arbennig gyda cherddorion gwadd ac elfennau gweledol a ffilm hefyd yn rhan o'r digwyddiad. Dyma gyfle i glywed setiau byw gan artistiaid gwadd yr albym a pherfformiad arbennig o ganeuon yr albym gan Ciwb a'u cyfeillion. Bydd cyfle hefyd i glywed y band ar Lwyfan y Maes, Eisteddfod Genedlaethol Wrecsam, ddydd Sadwrn, Awst 1af.